尋人

今日係年初二，再次恭祝大家健康快樂！萬事勝意！

新年，自然會想到利事。近幾年都收到一封神秘大利事，大前年一百元，前年二百元，去年數十元個封唔知算唔算係。係除左自己家人俾既利事以外，最大封既利事！好在我唔係身居要職既人，否則的話我會覺得佢係行賄，哈哈！

大前年同前年都應該係同一個人，但我完全唔知佢係邊個。我有個習慣係，所有利事都會等到至少過左正月先拆，有時甚至會放係一邊，過左幾個月後，等錢駛時先拆。除非寫名，否則的話，到拆時真係唔知邊封係邊個俾既。

前年收到封大利事時，我係記得我有留意到個利事封，因為個利事封係屬於某報館既，覺得較為特別，所以有望下。但之前最重要既畫面，就係到底係邊個俾既呢？就成為記憶盲點，完全想唔起！

我估應該係公司中人，因為只係得一封，而望個利事封時既記憶片段好似係公司內。

所以在此呼籲各位知情人士，如果有人收過類似既利事，或者會知道係邊個俾既，麻煩請話我知，我都只係想特別多謝番佢！唔該！